عرض مشاركة واحدة
قديم 01-07-2017, 02:07 PM   #1
أبومنصور
ضيف
 
تاريخ التسجيل: Aug 2013
المشاركات: 5
معدل تقييم المستوى: 0
أبومنصور is on a distinguished road
افتراضي خرب قير السنتافي ابي ورشة يالربع متخصصه تصليح القيرات بالرياض

مساكم الله بالخير يالربع

وكل عام وانتم بخير بعد الزحمه

والله يفرج همي وهمكم إن شاء الله

الحمدلله يا اخوان قدّر الله وخرب قير سيارتي السنتافي 2014 سلندر6
السيارة ماشيه حدود65 كم
والحمدلله خرب بعيد عن بيتي ب4كيلو
قدرت اني امشي بالسيارة بالريوس (r) بين الحواري لين وصلت البيت

المشكلة مو هنا
يوم اني مشيت بالريوس
لاحظت الحرارة ارتفعت لين قبل النهاية بخط واحد إلى قبل خطين (يعني مابينهم)
هل هذا يعني ان المكينة لا سمح الله خبطت والا من القير؟

القير صار خلاص مايمشي منه إلا الريوس وبس

والله يا اخوان
كنت استخدم سوناتا 2010 موديله و4سلندر
اني لعنت خامس ابوه
وطعست به صحاري
وغطست به جرافات موية من الامطار
وماشاءالله عمرها لا خبطت مكينته ولا قيره
لكن الحاجة الله يلعنها اللي حدتني بعت السيارة حسوفه

وشريت سنتافي هالمخيس ذا
ماتم ثالث السنة من الضمان الا يخرب
واروح للوكاله قبل لا ينتهي الضمان ب4شهور
ويقولون مافيها شي السيارة
وانا كنت حاس ان السيارة بتخرب من القير
لأن كل شوي ينتع بتعشيقة القير

الحاصل انتهى الضمان وخربت السيارة علي اليوم
واحذركم لا تشترون سنتافيه (والله خرابه كثير)
وحسبي الله عليهم الوعلان ونعم الوكيل ( لا صيانة مهتمين ولا ادارة صالحين )

واعذروني يا اخوان والله تبهذلت مع هالسيارة
فرحت فيها اول سنة
ثاني سنة وثالثها والله عالم اني ماتهنيت فيها زين
يازين السوناتا وليتني مابعتها
حتى ماتصدقون ، بعتها بـ10 آلاف السوناتا عشانها كانت مرشوشه
السوناتا هذي قد صدمت فيها صابونه (شفرليت) طيرت شنطتها بالكامل
وماتأثر السوناتا إلا الصدام انخلع شي بسيط

لكن سنتافي و2014 وسلندر6
ويخرب قيره كذا بسرعه معي؟ اقسم بالله صناعه فاشله

طلبتكم يا اخوان
وانتم قدها وقدود يالربع
انا ساكن بحي الشفا بالرياض
ابي ورشة متخصصه في تصليح القيرات (مايهمني حتى لو كانت بالصناعية القديمه)
أهم شي يضبطون القير
وعهد علي وبذمتي عمولة 200ريال
للي يدلني على ورشه تضبط القير وتخليه مثل الوكالة

وهل فعلاً خبطت المكينة يوم ارتفعت الحرارة والا لا؟
لأن السيارة ما مشت إلا بالريوس وصارت ترتفع اكثر كل ما امشي بالريوس

وجزاكم الله خير

والله لا يحدكم لمكروه
ويوفقكم
ويسهل اموركم
ويجعلكم موفقين
أبومنصور غير متواجد حالياً   رد مع اقتباس