راح اقول قصتي مع السنتافي وألي واجهته من مشاكل معها

بالبداية كان معي سوناتا 2009 وكنت مرتاح معها والحمد لله ألين جاء يوم امطرت فيها الدنيا والشوارع غرقانة وقدر الله وما شاء فعل غرقت سيارتي وانكسرت المكينة وشريت ماكينة من التشليح بس بعدها عفت السيارة وبعتها

وشريت سنتافي 2014 6 سلندر نص فل بانوراما
وياليتني ما شريتها
كنت فرحان فيها وكنت اعتبر هيونداي شركة جودتها عالية بحكم تجربتي مع السوناتا

أول ما ما مشت السيارة 800 كيلو بس تخيلو 800 كيلو بس واجهت أول مشكلة

وكانت السيارة اذا مشيت بمطبات صغيرة أو لفيت يطلع صوت عند الكفر الأمامي يمين
وديتها الوكالة وقالوا دودة الدركسون خربانة وراح نغيرها لك على الضمان
قلت اوكي اسبوع وبعدها استلمت السيارة
وطلعت عندي مشكلة جديدة
اذا مشيت بالسيارة وجتني اشارة وابي اهدي اضرب فرامل علشان اخفف وهي تهدي سرعتها تسمع صوت غيارات القير والسيارة كأنها تنتع من قوة النمرة
وديتها الوكالة و 5 أيام ما اتصلوا علي رحت اشوف وش المشكلة
لقيت السيارة داخل الورشة الخاصة بالوكالة رامينها هناك ولا سووا فيها شيء يقولون انهم فحصوها كمبيوتر ما طلع فيها شيء وقالوا فيه سيارة نفس سيارتك وأشرلي عليها يقول نفس مشكلتك ولها فوق الشهر عندنا فخل سيارتك عندنا ونشوف وش نسوي فيها
قلت أجل علمكم غانم عطوني سيارتي لا بارك الله فيكم لأني كنت مستأجر سيارة

استلمت السيارة وفحصتها برى كلهم يقولون السيارة ما فيها شيء
قلت يمكن انا موسوس وحاولت اتعايش مع هالمشكلة


ثم طلعلي صوت تنسيم عند البيبان
ورجعتها للوكالة وغيروا الجلد حقت البيبان وخف الصوت

ثم طلعلي مشكلة بالنوراما ما تقفل بسرعة جداً بطيئة
ورحت للوكالة وغيروها على الضمان طبعاً

وبعدين طلعت مشكلة جديدة المكيف صار حار ما يبرد
طلع واحد من ليات المكيف انفلت وسرب الفريون فكبست اللي وعبيت فريون
طبعاً مشكلة ليات المكيف واجهتها تقريباً فوق 4 مرات ينفلت اللي واقوم اكبسه واعبي فريون
ألين جاء اليوم ألي جيم فيه الكمبرسر بسبب كثرة تنسيم الليات واضطريت اني ارهم كمبرسر حق سوناتا ب 1400 ريال لأن كان سعره الكمبرسر بالوكالة حوالي 3000 ريال هذا غير شغل اليد

وثم طلعتلي مشكلة
أزرار المسجل ألي بالطارة ما تشتغل
يبيلي تغيير شريحة الدركسون

وبعدين طلعتلي مشكلة ثانية السيارة صارت دفع امامي بس
الدبل خرب فضطريت اني اشتري كارونة كاملة من الشتليح ب 1700 ريال ومع التركيب 300 ريال

وبعدين طلعتلي مشكلة
السيارة تحذف يمين اسوي ترصيص وزن اذرعة وزن دركسون وبعدها باسبوعين تحذف السيارة يمين

وبعدين طلعتلي مشكلة
كان يطلعلي صوت اذا اكلت المطب يطلع صوت طقطقة عند الكفرات
اكل ما امر الصناعية ويركب معي واحد من حقين الورش علشان اسمعه الصوت تخيلوا الصوت ما يطلع واوديها فوق الحفرة يفحصونها ويقول كل شيء سليم
ألين اكتشفت ان جلد عمود التوازن منتهية وصلحتها



فنصيحة ما ابيك تتبهدل وتتعب ويصير لك زي ما صارلي
وصدقني لو يتصلون علي الوعلان الحين ويوقولون مبروك فزت معنا بسيارة سنتافي
صدقني بقفل السماعة في وجيههم
السيارة كلها عيوب والمشكلة بعض العيوب ما لها حل او حلها مكلف

فنصيحة محب اذا انت مقبل على شراء هذي السيارة الغبية فأنصحك انك تتراجع عن امر الشراء
ورح اشتر راف فور او مازدا cx9 اهم شيء ابعد عن السنتافي